zindagi aaj Mout ki daawat udaa rahi hai

Kashti meri toofan se seena lada rahi hai

zindagi aaj Mout ki daawat udaa rahi hai

nikla hai parinda chonch se baajh maarne

“houslaa” aaj “daar” ke paseene chuda rahi hai

paseena baha ke apni kismet banata hu main

halaat tu apne fande se kisko dara rahi hai

andhere mein rehnewaale hi jaane roshni ki keemat

wo maa tan bechkar apne bachhe padha rahi hai

mushqilo se har baar hum yahi sochkar bhide

pathar ko zindagi shayad nageena bana rahi hai

jaane kub jagega bhagwaan aasmaa mein

lalach gharo mein aaj bhi beti jalaa rahi hai

Aa raha saheed hokar maati ka laal upar

jannat ko aaj jamkar pariyaa sajaa rahi hai

vishwas ki ganidth kabhi palle nahi chadhi

hawaien jahan hai tej wahi “deepak” jala rahi hai

ganidth = mathematics

ghar magar kaanch ka banaate hai

Dard mein bhi muskuraate hai

 hawaon mein diya jalaate hai

iske aagey nahi kadamo ke nishaan

manzil tak jaane koun jaate hai

In parindo ko udaan dekar dekho

kitne hai jo lout paatey hai

dil mein pathar hai saare logo ke

ghar magar kaanch ka banaate hai

yun hi nahi marta yaqeen logo ka

log insaaniyat ko bech khaate hai

koun maanega meri baahon mein

jawaan khawabo  ko wo lutaate hai

bas yahi reh gaya baaki “deepak”

khotey sikko ko ajmaatey hai

Ai junoon e ashiqui, deewana hi bana de

Ai junoon e ashiqui, deewana hi bana de

Gumnaami ka tu mere fasaana hi baana de

Kab tak tere fareb mein zinda rahenge hum

Ab mout  ka tu koi bahaana hi baana de

Mujhpar nazar pade, kisi keemat magar pade

mujhko tu uske patharo ka nishaana hi bana de

tere naam ki khushi nahi toh gham tera sahi

tu dil ko mere dard ka thikaana hi bana de

meri zindagi toh teri inaayat se hi sajegi

manzil nahi banaaya, toh mehkhana hi bana de

shamma ki tarah rounak e mehfil bani “deepak”

mumkin hai wo har saksh ko parwana hi bana de